Usgsürpflet

Hallo ihr liebe Sürpfler-Fründe

Mer wänd euch allne nomol ganz härzlich danke säge, für die letschte 15 Johr, für die tolli Abschlusssaison und nid zletscht notürlich au no für die grandiosi Überraschig a eusem allerletschte Fasnachtstag in Rinike. Es isch en wunderschöne, aber notürlech au emotionale Abschlusstag gsi, wo mir eus immer wärde dra zrug erinnere.
Es isch das Johr au vom erschte bis zum letschte Fasnachtstag en sehr schöni Abschlusssaison gsi, womer mit euch zäme nomol so richtig händ chönne gnüsse,
DANKE VIELMOL!

I eusere Fotigalerie chönd ihr euch nomol a die schöni Ziit, bzw. au a di letschte Johr zrug erinnere: http://www.flickr.com/photos/kbsvilligen/collections/

Danke a dere Stell au no eusere Meli, wo do dri immer vieli vieli Stunde investiert het!

Jo ond jetz… bliibt eus leider nüm viel meh übrig, als euch allne uf euchem wiitere Wäg alles gueti zwünsche. Mer hoffed, euch hets mit eus au immer so Spass gmacht, wie eus mit euch. Bestimmt laufed ihr aber öppe die no am einte oder andere einzelne Sürpfler über de Wäg, so as mir nid komplett us euchem Läbe verschwinde, und mer ned ganz in Vergässeheit grote :-)

Danke für alles!
Liebi Grüess vo euchne Sürpfler